शुक्रबार, भदौ १३, २०८२
मा प्रकाशित
0
Shares
बर्दिया,भदौ १३(फरकसमाचार) / भारतीय नाइके रहेको ठगी धन्दा चलाउने गिरोहको प्रहरीले खुलासा गरेको छ । सर्वसाधारण नेपालीलाई विभिन्न प्रलोभनमा परी भारतीय गिरोहले ठगी गरेको प्रहरीले खुलासा गरेको हो । उक्त भारतीय गिरोहलाई कमिशनको लोभमा नेपालीले बैंक खाता खोलेर सघाँएको पुष्टि गर्दै इलाका प्रहरी कार्यालय ढोढरीका प्रहरी निरीक्षक महेन्द्र सेनले खुलासा गरेका हुन् ।
गत असार अन्तिममा भारतीय ह्वाट्स एप नंम्बरबाट अपरिचित व्यक्तिले पिडितलाई कल गर्छन् । दुई तीन दिन कुराकानी हुन्छ र पिडित ठगको जालोमा फस्छिन् । तपाईको नाममा मँहगा सुनका गहनासहितको उपहार परेको र त्यसको भन्सार वापतको रु २५ हजार जम्मा गर्न पिडितलाई बैंक खाता आउँछ । पिडितसंग पटक पटक रकम पठाउन लगाएको र नपठाएमा कसैलाई जानकारी गराएमा नाङ्गो फोटो श्रीमानलगायत आफन्तलाई पठाउने अपरिचित व्यक्तिको धम्की आउँछ ।
मोबाइल बैंकिङ र आइपिएसमार्फत अनिता सुनारको नेपाल बैंक लिमिटेड धनगढी शाखाको खातामा पटक पटक गरि रु १ लाख ९५ हजार, जगतराम थारुको गरिमा विकास बैंकको खातामा रु १ लाख ३५ हजार, विष्णु ज्ञवालीको नाममा रु ४० हजार र क्रिशल कार्कीको नामको बैंकको खातामा रु १२ हजार गरि जम्मा रु ३ लाख ८५ हजार पठाई सकेको पिडितले यही भदौ ६ गते प्रहरीमा उजुरी दिन्छन् ।
उजुरी आएपछि प्रहरीले सुष्म अनुसन्धान सुरु गर्छ । अनलाइन ठगी गर्ने गिरोहका तीन जनालाई प्रहरीले मंगलबार पक्राउ गरि ठगी अपराधमा मुद्दा दर्ता गरि प्रहरीले अनुसन्धान अघि बढाएको छ । पक्राउ पर्नेमा बारबर्दिया नगरपालिका–११ का बिनामिन विक, बिर बहादुर सुनार र वडा नंम्बर ६ का जगतराम थारु रहेका छन् । यसरी प्रहरीले तीन जनालाई पक्राउ गरेपछि १० करोड ठग्ने योजना विफल भएको छ । यसरी नेपालीको लाखौं रकम भारतीय ठगको हातमा पर्दै गरेको खुलासा भएको छ ।
ठगी कार्यका मुख्य व्यक्ति बारबर्दिया नगरपालिका–११ का बिनामिन विक रहेको प्रहरीको अनुसन्धानबाट खुलेको छ । ५÷६ महिना अगाडी युटुवमा गरिबहरुलाई सहयोग गर्ने हर्श साई नामको भारतिय संस्थाको भिडियो हेरी उनले त्यहाँबाट ह्वाट्सएप जोइन गरेका थिए । ह्वाट्सएप जोईन गरि कुरा गर्दा २० जना मान्छे बनाई खाता खोलेमा २०/२५ लाख पाउने खबर पाए । त्यसपछि प्रलोभनमा परि आफ्नो १७ वटा, बारबर्दिया नगरपालिका–११ का बिर बहादुर सुनार, वडा नंम्बर ६ का जगतराम थारु, सोमराज थारु, ठागुराम थारु, रामजानु थारु, डम्बर बहादुर विक, मनिराम थारुको १७/१७ र सुरेश थारुको १ गरि जम्मा १ सय ३७ खाता खोलेर मोबाइल बैकिङ्ग बनाएका थिए ।
सबैको सिम कार्ड र मोबाइल बैकिङ्गको आईडी र पासपोर्ट ह्वाट्सएप मार्फत स्क्रिन शेयर गरि भारतीय व्यक्ति (म्यानेजर) लाई पठाएका थिए । १०/१० वटा ई–सेवा र खल्ती खातासमेत खोलेर त्यसको पनि आईडी र पासपोर्ट भारतीय व्यक्तिलाई पठाएका थिए । हालसम्म यो कार्य गरे वापत विकले करिब ५ लाख रकम भारतीय व्यक्तिबाट पाईसकेका छन् । विकको घरबाट १३ वटा सिम, विभिन्न बैंकको ११ वटा चेकबुक, विभिन्न बैंकको ५ वटा एटिएम कार्ड बरामद भएको प्रहरीले जनाएको छ ।
पक्राउ परेका सुनार ५ महिना अगाडी विकसंग भेटेर २०/२५ लाखको प्रलोभनमा परि ठगीमा लागेका थिए । सुनारले कैलाली पुर्णवास नगरपालिका–९ की अनिता सुनार, रमेश मिस्त्रीको १७/१७ र बारबर्दिया नगरपालिका–११ का मनिराम थारु, वडा नंम्बर १० का तुल्सीराम थारुको ४ वटा गरि ६८ बैंक खाता खोली सबैको मोबाइल बैंकिङ्ग बनाए वापत रु २ लाख प्राप्त गरिसकेका छन् । यस्तै विक र सुनारसंग गत असारमा भेटेर जगतराम थारुले आफ्नो, छोरा, बारबर्दिया बैदीका परशु थारु, वडा नंम्बर ६ का हरि थारुको १७/१७ गरि ६८ वटा बैंक खाता खोली मोबाइल बैंकिङ्ग बनाए वापत हालसम्म रु १ लाख ५० हजार रकम प्राप्त गरिसकेको प्रहरीले जनाएको छ ।
ठगी गर्ने तीनै जनालाई नियन्त्रणमा लिई ५ दिनको म्याद लिई थप अनुसन्धान भईरहेको जिल्ला प्रहरी कार्यालयका डीएसपी चक्र बहादुर डमरपालले जानकारी दिए ।
सामाजिक संजाल फेसबुक,ह्वाट्सएप, आईएमओ र भाइभर मा नचिनेका व्यक्तिले पठाएको म्यासेज, लिंक, फोटो र भिडियोमा विश्वास नगर्न जिल्ला प्रहरी कार्यालयले अनुरोध गरेको छ । मंहगा उपहार, आफन्त अस्पतालमा छ भनेर सापटी माग्ने, तपाईको आफन्त जेलमा छ पैसा भएमा छुट्छ यवात कुरा राम्रोसंग बुझ्न, बैंक खाता, मोबाईल बैंकिङ्गको पासपोर्ट, सिमकार्ड कसैलाई नदिन र ठगीमा आफन्त पनि हुन सक्छ बुझेर मात्र विश्वास गर्न प्रहरीले अनुरोध गरेको छ ।
